ژیاننامه‌

ماهیر له‌ ساڵی 1973 له‌ شاری ڕواندزی باشوری کوردستان له‌دایکبوه‌. خوێندنی سه‌ره‌تایی هه‌رله‌و شاره‌ ته‌واو کردوه‌ . له‌ته‌مه‌نی 12 ساڵیدا له‌گه‌ڵ خانه‌واده‌که‌ی چوه‌ته‌ هه‌ولێر.

له‌ته‌مه‌نی  مناڵیدا له‌لای مامۆستا زرارمحمد مسته‌فا به‌شداری له‌ خولی فێربوونی موزیک کردوه و‌ سه‌ره‌تای به‌هره‌کانی هه‌ست پێ کردوه‌. ماهیر پێی وایه‌ ئه‌و مامۆستا مه‌زنه‌ ڕۆڵێکی گه‌وره‌ی هه‌بووه‌ له‌ به‌ره‌و پێشبردنی موزیک و په‌روه‌رده‌ کردنی منداڵانی ئه‌و شاره‌ چونکه‌ ئه‌و هه‌مو ژیانی خۆی بۆ ئه‌وه ته‌رخانکردوه‌‌ و به‌ کردنه‌وه‌ی ده‌یان خولی فێربوونی موزیک بۆ ماوه‌ی زیاتر له‌ 30 ساڵ ، چه‌ندين موزيسیانی به‌توانای پێگه‌یاندوه‌‌.

ماهیرله‌ ساڵی 1991  له‌ به‌شی شارستانیی کۆلێژی ئه‌ندازیاریی زانکۆی سه‌لا‌حه‌ددین وه‌رده‌گیرێت. له‌ ساڵی 1993 له‌ گه‌ڵ هاوڕێکانی تیپی موزیکی زانکۆ داده‌مه‌زرێنن و چوار ساڵی یه‌ک له‌ دوای یه‌ک چوار فێستیڤاڵی گۆرانی و موزیک له‌ هه‌ولێر ساز ده‌که‌ن . ماهیر له‌و فێستیڤاڵانه‌دا به‌ چه‌ند گۆرانیه‌کی تازه به‌شداری ده‌کات و زیاتر تواناکانی پیشانی ئاماده‌بوانی ئه‌و فێستیڤاڵانه‌ ده‌دا‌ت. هه‌ر له‌و ساڵه‌شدا یه‌که‌مین گۆرانی خۆی بڵاو ده‌کاته‌وه‌.

ماهیر تا ئێستا چوار ئه‌لبومی گۆرانی به‌ ناوه‌کانی (وه‌رزی سه‌هۆڵبه‌ندان 1997 ) (به‌سه‌رچووم 2000 ) و(درۆیه‌کی شیرین 2003 )‌ و چواره‌مین ئه‌لبومی (دڵ ئاوێنه‌ی دڵه‌) له‌ مانگی یه‌که‌می 2008بڵاوکردۆته‌وه‌. جگه‌ له‌وه‌ له‌ ساڵه‌کانی 1999 ، 2001 ، 2003 و 2004 چوار کۆنسێرتی له‌ شاری هه‌ولێر و چه‌ند کۆنسێرتێکی دیکه‌ی له‌ چه‌ند وڵاتێکی ئه‌وروپا ئه‌نجامداوه‌.